РУСКИ КЕРЕСТУР – У културно-забавней часци тогорочней манифестациї „Днї керестурскей паприґи”, и на тот завод були обдумани рижнородни змисти и награди, а зоз програму наступели шпивацка ґрупа зоз Словацкей Републики, як и домашнї аматере Дому култури.
Тота часц Манифестациї почала з дефилеом парадних кочох членох домашнього Конїцкого клубу „Русин”, а потим виведзена културно-уметнїцка програма.
Домашнї ше представели зоз танцом наймладшей фолклорней секциї, потим наступела Хлопска жридлова ґрупа з двома народнима шпиванками, а Вельки народни оркестер одграл венчик шпиванкох. Потим наступели госци шпиваче Фолклорней ґрупи „Роньва” под руководзеньом Терези Кубаньовей на гармоники, з валалу Сланске Нове Место.
Госци з того места до Керестура пришли першираз, вєдно з уж познатима госцами зоз им сушедней Земплинскей Теплици, на чолє зоз старостами тих местох Миланом Дихенещиком и Йозефину Угальову. Тоти места нєдавно нащивел керестурски Дом култури у своєй турнеї у Словацкей, та взаємни госцованя уж поставаю традицийни.
Орґанизатор и того року додзелєл награду – мажочку, за найчежшу паприґу хтору достал продукователь Зоран Йованович, за паприґу чежку 453 ґрами, а за найкрасше ушорени штанд зоз слункобраном наградзени Янко Чизмар.
Того року першираз було и змаганє у вареню айвару у хторим участвовали три екипи – перше место освоєли Керестурци Штефка и Михайло Фейди, друге место Югасова фамелия, а треце место госцуюца екипа зоз Парачину.
Орґанизовани бул и традицийни маскенбал дзецох хтори того року були маскирани виключно у духу паприґи, и позберал красне число дзецох од предшколских по школярох нїзших класох. Першу награду за найкрасшу маску достал Стефан Арва, другу Адрияна Рац, а трецу шестри Кристина и Милена Рамачово.
Вельке число нащивительох могли коштовац рижни єдла зоз штернац котлох и печеньох, а после урядовей програми хтору водзел Емил Няради, забавяли ше з музику ґрупи „Пицикато бенд”, а потим з познату новосадску ґрупу „Ґарави сокак”. Того року першираз под час Манифестациї була отворена и Музейна збирка у Замку хтору обишло вельке число нащивительох, як госцох, так и домашнїх Керестурцох.

За други дзень Манифестациї того року було предвидзенє обиходзенє и розпатранє валалу на парадних кочох хторе би за госцох пририхтали члени домашнього Конїцкого клубу „Русин”. Медзитим, тото нє витворене понеже госци мушели скорей одпутовац. Пред одходом були на Велькей Служби Божей у Катедралней церкви хтору служел домашнї капелан о. Владимир Медєши и о. Станислав Дихенещик, парох у Братислави, а родом зоз Сланского Нового Места, як и нашо госци.